TRABALLANDO COAS IMAXES

1.  Que podemos observar dende a fiestra da clase? Describe o que ves. Que tipo de paisaxe temos diante de nós? Que cualificativos elixirías para definilo (podes usar varios ou mesmo propor ti algún máis): espazo caótico, espazo ordenado, moita calidade, pouca calidade, atractivo, repulsivo, gris, vivo, seguro, inseguro, pobreza, riqueza, bonito, feo, espazo duro, espazo amable, ruidoso, tranquilo ...   ? Por que elixiches eses cualificativos?

2.  Algún alumno/a vive neste barrio? Se a resposta é afirmativa, que vantaxes e que inconvenientes ten vivir aquí?

3.   No caso de non haber ningún alumno vivindo no barrio: Poderíamos imaxinar os aspectos positivos e negativos de vivir aquí?
4.   Que elementos abióticos, bióticos e antrópicos vemos pola fiestra? Cal credes que é o elemento dominante? Credes que o feito de que o barrio sexa    atravesado por un río é algo positivo? Por que?
5.   Dirías que é unha imaxe de gran calidade paisaxística? Por que? Dirías o contrario? Por que?
6.   Observa estas imaxes antigas do barrio e compáraas coas actuais:

• Usarías os mesmos cualificativos de antes para definir as imaxes antigas? Por que ?  Cres que a fisonomía do barrio mudou un pouco, bastante ou moito?
• A que cres que se deben esas transformacións?
• Tendo en conta como era o barrio antes, que elementos actuais cres que están alterando, para mal, a estampa urbana? Por que?
• Que aspectos te sorprenden nas imaxes vellas deste espazo?
• Que reflexión te suxire o feito de ver nenos bañándose no río? Cres que se compren as mesmas condicións na actualidade? Por que? Pescuda na prensa se hai verquidos no río Gafos e onde se producen?
• Se falamos do río Gafos, busca información sobre el. Pescuda onde nace, a súa lonxitude, as parroquias que percorre antes de chegar á súa desembocadura e a procedencia do seu nome.
• Na outra imaxe antiga vemos mulleres lavando. Os lavadoiros eran lugares de encontro das mulleres, as encargadas de lavar a roupa; sabías que antigamente eran lugares moi concorridos? Pescuda nas razóns polas que elixiron ese lugar para establecer o lavadoiro? Que aproveitan? Pescuda cando se xeraliza o uso das lavadoras nas casas.
• Un espazo, un sitio, pode ser un punto de atracción, pero ao perder a súa función orixinal queda esquecido polo tempo, cres que isto lle pasou a este lugar? Dende cando cres que entra en decadencia?
• Na antigüidade, os ríos eran moi importantes porque proporcionaban aprovisionamento de auga, eran fontes de enerxía natural para mover os muíños fariñeiros e como acabamos de ver, eran lugares de encontro para lavar a roupa, porén hoxe perderon esa función.  En que se traduce esa perda de importancia? En que cres que se converteu este río?

       7.   Observa esta imaxe

• Recoñeces na fotografía antiga algunha construción que perdure na actualidade.
• Sabes cal podería ser a función desas construcións? Pescuda sobre o funcionamento das mesmas. Que importancia podería ter a súa existencia?
• A transformación do barrio visto desde esta perspectiva é moi potente. Sabendo como era, cres que se fixo ben esa transformación? Por que? Xogando cos anteriores adxectivos, como cualificarías esta imaxe?
• Na fotografía antiga, as casas que se ven nun segundo plano corresponden coa actual rúa de Rosalía de Castro. Vendo o tipo de inmobles dirías que o tecido da cidade chegaba ata aquí ou non?. Pescuda a poboación que tiña Pontevedra a comezos do século XX.